LikeCoin 兌換港幣 MyEthShop 全攻略
LikeCoin 經已轉為 LikeCoin chain，全新教學請睇呢篇 全新 LikeCoin chain 版本：LikeCoin 兌換港幣 MyEthShop 全攻略
呢篇寫廣東話，因為我知大多數要將 LikeCoin 換做港幣嘅都係香港人，所以唔文皺皺啦。其實香港咁多人賺 LikeCoin（官方之前報告過 Top 5入面其中一個係香港人）同成為讚賞公民，好應該有方便將 LikeCoin 兌港幣嘅渠道。尋日官方 Facebook 出咗個咁嘅 post 之後：
今日就發現我用開嘅 MyEthShop show 咗呢件嘢出黎：
咁梗係要即刻試吓啦！
如果你唔想睇咁多想即時開戶嘅話，可以用 我嘅 MyEthShop referral link 或者推薦碼 D36C6C。係咁 cap 圖真係手都軟埋，不無小補呀，多謝！MyEthShop 收費及基本資料
首先講吓收費，由於 MyEthShop 係一間場外交易嘅找換店，無論存款、提款同交易都係 0 收費。驗證咗電郵嘅 Tier 1 客戶可以入去佢個界面度齋睇，感受吓個場係點用。而驗證埋身份證明文件同住址證明嘅 Tier 2 客戶每日可以提存港幣 100–50,000，對普通想換吓 LikeCoin 嘅朋友應該好夠駛。留意返最低交易額係 10,000 LIKE，即係話如果你儲唔夠 LikeCoin 就要夠數先至可以賣。
如果你想投資買 LikeCoin，可以網上銀行過數、櫃員機過數、轉數快(FPS) 或者用現金，想用其他方式嘅話都可以試吓 Facebook Message 佢哋個 page 同客服講。
要講返 MyEthShop 嘅 KYC（即係身份驗證）係唔駛寫張紙好似犯人咁樣舉牌嘅，對比其他交易所會唔會感覺好啲？一般需要兩至三個鐘頭就認證完成，比我試過嘅任何一間加密貨幣交易所都快捷。辦公室服務時間係週一至週五（公眾假期除外）10:00–18:30，不過我試過夜晚 office hours 之後將加密貨幣存入都好快回覆，只係如果你要由加密貨幣轉換為港幣就無咁快，都要第二朝先至搞到，但真係超快速。雖然網頁帶哂頭盔話要 12 個鐘，不過我試過等錢駛響 Facebook 催催佢，又秒回，都唔知係咪唔駛訓覺。咁 MyEthShop 老闆又上哂訪問點哂相，有乜事上黎保障相對大啲，總好過去山寨兌幣嘅又。再者佢哋仲搞咗個 Wallet，就算執Q咗你啲幣都仲響返度，所以唔駛俾唔夠 fancy 嘅界面影響，即管放心交易。
將 LikeCoin 轉換為港幣
頭先都講咗 KYC 真係好鬼簡單，響主選單嘅「設定」可以處理，故此呢 part 我唔多寫啦，你可以直接去 MyEthLabs 了解更多佢哋嘅網站操作同買賣知識。記得一定要睇 MyEthShop雙重驗證(2FA)的設定教學開返雙重認證，呢樣真係好重要。
第一步：將 LikeCoin 存入你嘅 MyEthShop 帳戶
Login 入 MyEthShop 個界面會見到咁樣，按落 LIKE 果度。
你會見到出現咗咁嘅畫面，因為我哋要賣 LikeCoin，於是要先將 LikeCoin 存入 MyEthShop 嘅個人帳戶入面。按「存款」。
接住出現呢一個畫面，按「LikeCoin 存款頁面」嘅連結。
會出現 https://like.co/myethshop 呢個版面。myethshop 呢個 ID 係鐵打嘅，放心將啲 LikeCoin 過俾佢哋啦。填入需要轉帳嘅 LikeCoin 金額，再按「確認」就得傢啦。用返 Like.co 嘅界面轉過去，仲唔駛俾 GAS Fee 添，真係超級開心仔。咁當然如果你鍾意俾吓 GAS 嘅，一樣可以將 LikeCoin 轉過去佢哋果個水蛇春咁長嘅 ERC-20 銀包地址。
之後會出現呢個畫面，有可能你需要等多一兩分鐘，但通常都係好快就搞掂。抱歉我有幾多家產要用紫色收埋一吓，當你見到出現「交易完成」後就按下面「於 Ethersan.io 查看」
抱歉又要用紫色收埋家產。Transaction Hash 就係你所需要嘅資料，你會見到果度有一堆數字，按一按右邊綠色箭頭指住嘅 icon 仔就會將你個 Transaction Hash copy 咗。
跟手去返 存款LIKE 呢個畫面，將頭先 copy 咗嘅 Transaction Hash paste 落去「 Transaction Hash/ TXID」一欄，再將你頭先存入咗嘅 LikeCoin 數量填寫落「 存入金額」呢一欄然後按「存款」，系統會話你知等待中之類。
正當我連等待中嗰個圖都未 cap 得切，就收到入帳通知，快到變態。
你亦會發現響帳戶果度嘅 LikeCoin 一欄多咗啲數字，就係你入咗嘅 LikeCoin 數量同埋大概等同幾多港幣，你可以按下面「交易／提存紀錄」睇返哂入帳嘅詳情。但係未完傢，你仲要交易先至可以將 LikeCoin 變返港幣。
有唔係太熟電腦嘅朋友會問如果整唔見交易完成果版，點樣可以搵返個 Transaction Hash？你可以登入 like.co，響主頁右上角按自己嘅 LikeCoin ID，再按交易紀綠，搵返 myethshop 呢個 id 紀錄就會出現返，唔駛擔心。
第二步：賣出 LikeCoin 兌換成港幣
按主選單上面嘅「交易」，再按左手邊嘅下拉選單選擇 LIKE/HKD，就會睇到「購買」同「出售」價，同埋有市價同限價盤。依傢我哋要賣 LikeCoin 就選擇「出售」。基本上市價果個大數字係會不斷彈跳，o岩價嘅，響「數量」果度輸入你要賣嘅 LikeCoin 數量，再按「下單」就可以。依傢張圖顯示嘅係「市價盤」嘅情況，所以「價格」果一欄你係無得填任何數目字落去，但如果你按「限價盤」，「價格」果一欄就可以俾你任意填寫數字，你按完「下單」之後市況到達心儀價位，系統就會自動執行指令幫你以好價賣出。為咗確認你心意堅決，會再有一個 pop up 彈出黎問你「www.myethshop.com says 確定交易?」，按「OK」就可以。
第三步：提取港幣
然後會出現呢個畫面，亦都代表你嘅 LikeCoin 經已正式兌換返做港幣啦！按「提取HKD」。
或者去主選單嘅帳戶度搵返港幣，按「提款」。
會出現 提取HKD 畫面，你需要按「新增銀行戶口」加入你嘅銀行戶口。
銀行「戶口持有人名稱」 需要同你做 KYC 個名完全相同，故此唔駛填亦無得填。響「銀行名稱」嘅下拉選單揀返你間銀行，填返「戶口號碼」，按「確定」就加咗。呢個步驟你填乜就係乜，MyEthShop 無責任亦無權去銀行攞資料幫你做核實，所以唔好填錯。
返去 提取HKD 畫面，輸入要提取嘅港幣數量，輸入手機嘅「雙重認證代碼」，再按「提取」。
HKD 確認提取 畫面繼續按「確定」
HKD 成功提取 畫面出現了。
同時你嘅 e-mail 亦會收到提示，咁就唔怕有人亂咁轉走你啲錢啦。
你可以按「帳戶」內 HKD 的「交易/ 提存紀錄」查看狀態。如果由「Pending」轉為「Success」，即係代表啲港幣經已成功入咗戶口啦~
亦會收到電郵通知。
可能因為平日都賣慣 ETH 嘅關係，將 LikeCoin 存入 MyEthShop 帳戶即係第一步我只係用咗五分鐘，再加上決斷英明，即買即賣完成第二同第三步的話，辦公時間內唔駛一個鐘就可以到帳。上面兩封電郵「你的MyEthShop帳號剛提出提要求」到「提款到銀行戶口成功通知」（提款到銀行呢封電郵原本係無傢，我俾 feedback 佢哋之後加返，真係有聽取用家心聲）中間相隔只係23分鐘，實在係快到癲癲哋，好適合繁忙香港人嘅節奏。我呢一次可能係因為未有人咁快知道可以交易 LikeCoin 佢哋想測試流程而得到特別處理，但總括而言 MyEthShop 真係好鬼快手，絕對係既方便又或者想急速套現嘅最佳選擇。
再補充返以上嘅步驟響手機一樣可以做得到，唔駛一定用桌面電腦。據聞遲啲 MyEthShop 會出自己嘅手機 App，到時就更加方便啦。
如果你響兌換嘅時候有乜嘢問題，歡迎留言交流一下，因為我經已盡量將啲步驟拆細希望講得清楚啲。當然你亦都可以 Facebook message MyEthShop 等佢哋解答啦。到最後講多次如果你要申請 MyEthShop 戶口嘅話請用我嘅連結或輸入推薦碼 D36C6C 同埋幫我按讚，等我可以寫更多香港兌幣教學，讓大家都有所得益。
如果你喜歡我的文字，請幫忙按 5 次 LikeButton 化讚為賞，回饋創作！請登記 LikeCoin ID，登入後你不需要付出任何金錢，只需要按 5 次我就會得到好處，感謝！