LikeCoin 得罪你啲乜？
今日多手，整咗一篇咁嘅文：
呢個題材其實想寫好耐，為咗整理思緒，最好先睇吓人哋有乜嘢觀點。事緣係有一位識咗好耐，都算係 blogger 時代嘅朋友 block 咗我。響佢 block（唔係仆，ok？）我之前，佢不斷響 Facebook 寫文話 LikeCoin 唔好 LikeCoin 乜乜物物，咁我梗係唔會俾反應啦。Well，人大咗，真係覺得如果唔係同你 friend 到撈亂底褲著（其實咁樣好唔衛生，會有念珠菌同 HPV 感染，大家真係唔好試），有好多嘢真係講多都無謂，明就明，唔明就唔明。之但係去到咁極端啦喎，咁我咪想研究吓點解會咁反感囉。其實對 LikeCoin 不滿嘅傍觀者，大多數都不出以下幾個原因：
ICO 嘅嘢，全部都係滾人，割禾青/ 韭菜（乜唔係「加啲韭菜更好味」咩？）就走佬，你都信？
其實信唔信嘅嘢，你真係問到我。同樣嘅問題，點解你唔會去問青姐點解當年會買匯控，點解見到佢狂跌會喊？而且 LikeCoin 過咗 ICO 好耐，啲管理團隊仲生歐歐響度（佢哋無俾人毒殺或者變性呀）個個月搞活動，你係唔係搞錯咗啲嘢？我唔係買家，我係用家咋喎，一毫子無攞過出黎，淨係寫文（嗱我無鳩寫傢）就得到 LikeCoin，點解唔可以從實際角度去講，而係一定要從信與唔信呢個角度去睇件事呢？而且啲 LikeCoin 響我個錢包度就響我個錢包度，除非我俾人 hack，無人攞得走我啲 LikeCoin 傢喎，咁 LikeCoin Foundation 呃咗我乜嘢？唔通係我嘅肉體（大誤！）？
LikeCoin 係假嘢黎，都攞唔到真錢嘅！
又係同我講真假嘅問題。你去交易所咪對換到法定貨幣囉，頂多係幾時換，點樣換，去邊間交易所手續方便啲個 rate 好啲。就算你換 Yen 都去睇吓百年定堅成方便啲同幾時低水買入高水賣出啦，LikeCoin 都係咁之嘛。反而我想問有乜嘢令你咁甘心情願將法定貨幣換咗做遊戲代幣，果啲都唔係真錢黎傢喎？老老實實，我先至唔覺得響遊戲入面攻打一個城堡得到代幣又換唔到港幣會開心得過創作之後得到可以換法定貨幣嘅 LikeCoin 喎。
講到尾，你又咪貪錢！
我唔知人哋點諗啦，但我寫咗咁多年嘢，真係無乜搵到錢話時話。除咗有一段時間博客經濟興起，都有收過啲公司嘅產品試用呀，樂園遊玩呀，真係無乜人 keep 住現兜兜俾過錢我。我呢啲咁嘅質地，打死都唔會去到廿萬 IG fans 露肉水著就可以一萬蚊出一次 post 嘅地埗。但係以前寫文，依傢又寫文，每日多多少少都好，依傢有人篤吓個 LikeButton 我就有 LikeCoin 收喎，呢樣係我以前寫文所無嘅價值。而且我唔駛做額外嘢，只係好似以前咁寫文咋喎，我有乸住把刀杭住你隻手叫你按個 LikeButton 咩，咁個問題其實響邊度呢？
如果放一個 LikeButton 響篇文度就係貪錢，咁果啲現兜兜俾個 Paypal button 叫你過數俾佢嘅作者，係咪要落地獄？填問卷得現金果啲呢？出賣自己私隱喎！睇廣告賺分？睇垃圾，購物主義，製造浪費喎！完全唔明堂堂正正寫文，有知音人欣賞就得到 LikeCoin，件事相比起黎係有幾錯。
Medium 同 SOSReader 收到真錢喎，你搞埋呢啲嘢做乜嘢？
又係返番去真錢唔真錢呢個問題。所謂嘅真錢，咪係現兜兜響你銀包果啲囉。響你銀行入面果啲叫數字，而且有乜嘢出錯都係乜都無哂傢咋。Come on James！加密貨幣係唔係錢呢啲我真係唔識點樣去扭轉你嘅睇法，你去搵果啲乜嘢加密貨幣學會去同你研究同解釋啦，ok？
SOSReader 個生態係點，點樣先至叫做成功，我無響入面玩，答唔到你。但 Medium 收費文所收到嘅收入真係咁理直氣壯？Medium 從來無透露過佢有幾多 member，你真心信 The highest amount earned for a single story $3,714.78, The highest amount earned by a single author $11,082.27, The percentage of active writers who earned over $100 8.3% 係由你每月五蚊嘅供養夠數去俾出黎？其實唔係淨止我咁講，有好多人都話 Medium 對作者係有補貼（否則融資啲錢點樣用？真係瘋狂買 server 咩！），而且 Medium 啲演算法，即係邊個會睇到啲乜嘢文，點解我俾咗 friend link 出去好似收少咗錢果啲邏輯都仍然係唔清唔楚。相對而言 LikeCoin 啲 transaction 響區塊鏈其實係公開任何人可以睇到，所以如果有人仍然係以有色銀鏡去睇 LikeCoin，又或者覺得用 Medium paywall 收錢先至高尚啲，我都無話可說。
LikeCoin 嘅敵人其實係邊個？
咪係果啲亂寫，鳩寫，寫幾句就當金句果啲茂梨，會破壞認真寫文嘅 LikeButton 使用者形象。不過到時 LikeRank 自然會招呼佢，呢樣我唔擔心。
到最後我想講，如果有人都係民智未開諗埋一邊嘅話，當然可以唔駛撈亂底褲咁同佢解釋，你大可以 forward 呢篇文俾佢，係咁。
如果你喜歡我的文字，請幫忙按 5 次 LikeButton 化讚為賞，非常感謝！
