Medium 魚蛋論
首先跟據黃子華所講，魚蛋論係咁嘅一回事：
「魚蛋論」，見於黃子華在2003年SARS期間舉行的《冇炭用》棟篤笑當中，藉舉出有關魚蛋的例子，諷刺香港人的「負面思維」取向，勾劃出當時香港人「我無人都要無」、「一齊仆街」的心態，但事隔多年不少網民認為此理論歷久常新。－ 香港網絡大典
響 Medium 上面嘅人，用我自己白痴嘅方式，主要分開以下幾大類：
1. 有戶口，齋睇有claps
2. 有戶口，有寫免費文有claps
3. 有戶口，有寫收費文有claps
4. 係會員，齋睇有claps
5. 係會員，有寫免費文有claps
6. 係會員，有寫收費文有claps
無錯，我經已將「無戶口，齋睇無得claps」、「有戶口，齋睇唔claps」、「係會員，齋睇唔claps」呢啲人唔計，因為基本上佢哋無「我claps故我在」，有無存在過響呢個世上我哋係完全唔會知。
問題唔會出在1同4身上，因為如果佢哋唔claps就同上面果堆人一樣我哋完全唔知佢哋嘅存在，但無論如何都要多謝佢哋，因為肯claps經已係對文字嘅肯定。
咁當然除咗每月免費果三篇，1、2、3係唔可以無限claps到3同6，所以每個月選擇住黎claps呢樣嘢係佢哋條界，亦體現咗乜嘢係真正嘅「愛就係選擇」。要睇嘅嘢有咁多，就算選擇唔做會員只係有戶口，唔代表佢哋唔支持呢個生態；起碼有claps、有留言、有轉貼、有響Facebook Group度Like吓post、有幫你衝流量同人氣，好過你貼咗篇文響度𡂿臭。
講真，我相信4響claps果陣唔會去睇吓篇文係2、3、5定6先至claps，而係見篇文係正嘅就claps。
故此問題係出響3、5同6身上。
3被形容為攞咗人著數又唔付出。Well呢個世界就係咁，總有啲人會舐到盡，但呢個係Medium嘅問題，佢咁樣設定得，當然有佢嘅原因，例如俾人試吓paywall嘅滋味，等佢感受吓各個唔同嘅載體搵唔搵到食。如果覺得咁樣係好唔公平嘅話，其實點解唔聯署去Medium建議只可以俾呢啲人試三個月，三個月之後佢一定要加入會員先至可以繼續玩paywall，否則對其他經已參加會員嘅作者好唔公平？要不滿，唔好坐響度齋講或者被動唔claps囉，每個人都經歷過試系統嘅階段或者有唔參與會員嘅原因，點解要好似鼓吹仇恨咁叫人唔好claps呢啲文？當然，我尊重每個人嘅做法，但應該係好文不論佢係pay定唔pay能claps就盡claps先至o岩而唔係因人／wall而廢言。又或者見到個作者真係有心寫唔係會員又paywall嘅咪private notes問吓佢唔參加會員嘅原因係乜嘢囉，或者人哋係學生跟本屋企人無辦法俾佢參加？我見過有人響medium group留言話自己因為呢一年拋個身出黎嘗試做生意連收入都無，所以唔係唔想參加而係真係想節省吓。講真如果真係有咁多又高claps數又唔係會員又真心攞著數嘅仆街，大家真係唔介意果啲所謂正義之士去爆佢一鑊囉，快啲黎，我第一個撐你！
5同6通常都係同一個人。有啲人會選擇一個星期有收費文有免費文等1、2、3可以免費睇吓佢啲文，其實真係好多謝佢哋，尤其高技術果啲，因為可以睇吓佢哋點解咁受歡迎，亦係認識佢哋嘅途徑。每次見到呢啲文，我都會claps爆claps好claps滿。
但留意，我講嘅係高技術唔係高人氣，因為有啲人寫文普普通通都可以得到好多claps，主要係因為佢哋響Facebook有一堆粉絲，但如果唔係佢過咗Medium，我真係識佢老鼠。不過呢啲人通常好強調話我寫free嘅文就係俾你嘅恩賜。講真唔係個個都認識佢嘅寫作風格，唔俾free文人睇又點知佢係堅呀？次次出free文都係響度叫人claps佢啲收費文，無其他。咁我唔排除佢真係好有寫作技術啲文係可以引到人做會員，但係睇唔到佢啲所謂深度文，係完全睇唔到呀，點知佢有幾勁呀？
仲有呢啲人通常因為叫人最好喪claps自己啲收費文，為免分薄利益，於是就會出埋啲似是而非嘅準則等人跟，好等佢哋粉絲唔好亂咁claps，最好只claps爆自己啲收費文，但到最後當然會補返一句叫大家多啲claps吓每個人啲文啦。呢啲NLP嘅嘢，其實好多人都識囉。
我都係果句，寫文係為自己唔係為人哋，有知音固然係好，無知音咪下次再寫好啲改善吓自己。太過計較拍手數量，個人都唔會健康啦，仲要搞埋準則搞到好似排除異己咁又有乜嘢謂？
無論邊個作者，要做嘅都應該係叫大家多多拍手盡能力支持所有作者，而唔係搞分化囉。
